A cewar rahoton Kamfanin Dillancin Labaran Hauza daga shafin sadarwa na Harkar Musulunci, waɗannan bukukuwa sun haɗa da jerin gwano na juyayi, al'adar sauya tutoci, jawabai na ilimi, da kuma wasan kwaikwayo na tamsiliyya da nufin raya juyin juya halin Karbala da kisan da aka yi wa Imam Husaini (AS) da sahabbansa amintattu cikin zalunci.
Bisa ga rahotannin da aka samu, ga yadda shirye-shiryen suka gudana a sassa daban-daban na Najeriya:
1. Marabar Jos (Jihar Kaduna)
A wannan yanki, masu juyayin Ashura sun fara ne da jerin gwano da ratsa manyan titunan garin. Bayan haka, a cibiyar ilimi ta Fudiyya, an gudanar da taron sauya tutar taya murna ta maulidi mai taken "Labbaika Ya Rasulallah" zuwa tutar makokin Ashura mai dauke da taken "Labbaika Ya Hussain". Bayan kammala wannan, "Malam Abdullahi Umar", wakilin 'yan uwa na garin, ya gabatar da jawabi inda ya bayyana muhimmancin soyayya da biyayya ga Ahlul Bait (AS) da kuma darussan da ke cikin gwagwarmayar Karbala.
2. Illela (Jihar Sokoto)
Shirin tarban watan Muharram a garin Illela shi ma ya amshi amon sanya tutar Ashura. A lokacin taron, an gabatar da takaitaccen wasan kwaikwayo na tamsiliyya wanda ke nuna abubuwan da suka faru a ranakun farko na watan Muharram da shigar ayarin Karbala filin fage. A bangare na karshe, "Malam Muhammad Bin Isma’il", wakilin almajiran Sheikh Zakzaky na garin, ya gabatar da jawabi kan abubuwan da suka faru na tarihi a ranar farko ta Muharram, sannan aka kammala taron da rera wakokin juyayi.
3. Kazaure (Jihar Jigawa)
A garin Kazaure ma, muminai da masu juyayin Ashura sun taru a cibiyoyinsu domin kaddamar da ranar farko ta makokin shekarar 1448 bayan Hijra, inda kamar yadda aka saba a kowace shekara, za su shafe darare goma suna sauraron shirye-shiryen addini da gabatar da makoki.
Ana tunatar da cewa, bisa ga sanarwar da Muryar Kafafen Sadarwa na Harkar Musulunci (Media Forum) ta bayar, wadannan shirye-shirye da suka hada da jawabai na fadakarwa, da’irorin ilimi, tamsiliyya, da sauran ayyukan al'adu za su ci gaba da gudana na tsawon darare 10 a dukkan da'irori da sassan mabiya a Najeriya.
Ra'ayinka